الفيمتوووووووووو :::::

((بسم الله الرحمن الرحيم))

السـلام عليـكـم ..
ياجماعة الخير ترى المـوضوع طـويل .. يعني لا تقرونـه على طـول اقروهـ لفترات



((البـداية))

غرفـة محيـّووسه .. وشاشه مكان المعالج .. ومعالج مكان الشاشه .. وعلب دنيت منتشرهـ في كل مكـان ..
سرير قدام الجهـاز .. كرسي جنب الباب .. واحـد نـايم في نص الغرفـه ..
وش تتوقعون هذا كله .. هذي مقدمـه لغرفتي انا واخـواني الاثنين اللي معي في نفس الغرفه ..

الا وهـم .. (حمـد) .. (نــافل) .. وانا (دهيليس)

طبـعـاً تقدم بنـا العمـر لنصبح شبـاب يافعيــن .. ليس لهم وظايف .. والكبير منهـم متـوظف على بند القبـور .. يعني حالتنـا حاله ..

المهـم نرجع لمحور الحديث .. اللي كان نايم في نص الغرفـة انا .. << توهـ يتذكر السـالفه

فجـأهـ تجي الوالدهـ غفر الله لهـاا .. وتقـول يا دهيليس .. قم وانا امكـ وجب لنـا اغراض من الدكـان .. نظرت فيهـا وقلت وش اغراضه ياميمتي .. قالت الحين انت قـووم ..

رحت غسلت وجهـي وجيت .. قالت جيب هذي المقاضي المسجله عندكـ .. قلت طيب وين حمــد .. وين نــافل .. قالت كلهـم راحـوا .. قلت وين راحـوا .. قالت والله مدري بس الاثنين راحـوا مع بعض .. قلت والله يايمـه .. يهالاثنين .. انهم ما قد ارسلتيهم .. ما منهم نفعه

واحد دلخ تلقينـه يناقز في حراج السيارات يحسب نفسـه شريطي ((حمـد)) وفي الاخير ما يدري انه خسّر صاحب السيارهـ وخسر هـو الثاني .. ولا الدبشـه الثـاني ((نـافل)) اخّس من هذرلوجيا بكثير .. يعني بالله في احد يروح يتسلف باص (دله) .. ويروح المنفـوحه ويحمل نـاس مالهم عد ولا حسـاب ويقعـد يمسـكـ خط القصيـم .. واذا الناس صاحـوا فيـه انت وش فيـكـ .. وين رايح .. ؟؟
قال اصبرو انت ويـاهـ .. هذا طريق مختصر .. ولا بعد يطـاردونـه امن الطرق .. ومسـوي فيـهـاا خطير .. يقـعد يحـوص بأمن الطرق .. يفحط يمين ويسـار .. شـوي الا ومسكرين الشـارع .. يجي يوقف عندهـم يقـولون له ليش ما وقفت .. يقـول والله كنت مشغـول وفي نفس الوقت كنت اكلم بالجـوال .. هذا عذر يمـه .. يقـول لشرطي كذا ؟؟
راحت تأففت وقالت تبي تجيب الاغراض ولا خلاص هـونت .. قلت الله يرضى عليـكـ خلاص بروح اجيب لكـ

**

رحت الدكـان .. ونظرت في الورقـه .. والاقي مكتـوب في الورقـه خبز .. جبن .. مكرونه .. لبن .. حليب ... الخ ..
والاقي مكتوب في اخر الصفحـه [فمتـو] .. فز قلبي .. رحت خليت الاغراض كلهـا وقلت صديق وين الفمتـو .. قال سـوف هينـا ياسديق .. المهـم .. شلت الفمتـو .. ونظرت فيـه نظرهـ وراهـاا إبتسامه عريضه .. مسكت علبه الفمتـو .. وقلبت على صفحه التعليمات .. ((يقصد المكـونات )) ..

**
المهم يـوم قريت تذكرت ايام كنـا صغـار .. تذكرت الحـواري القديمه .. تذكرت اول ماجانا الفمتـو .. ذاكـ الوقت كنا انا وحمـد ونـافل.. تعبانين .. مصاخين .. المهـم .. في ذلكـ الوقت الجميل اللي بغينـا نروح فيهـا كلنـا وطي .. راح نـآفل للمطبخ .. وشـاف الفمتـو .. وكانت خشـومنـا فيهـا حاجات سايله تطلع منهـاا .. المهم جـاء يركض ومسرع ومعه علبه سـودا صغيرهـ ويركض ,,وكل ما قرب يزيد في السرعه .. لين قام حمـد يتنافض في مكانه[يرفع رجـوله فـوق ويهـز رأسه على قـدم من الرااعه ] .. طبعاً حمـد كان منسدح من الصخنه .. وكان عـآرف طفاقه نـافل المهم يوم قرب ويصفق العلبه في رأس حمـد .. وهـو صفق في الجدار اللي وراء .. معروف نـافل ما عندهـ فرمل مثل سيارته .. جلس وقال جبت لكـم قـطوع ريح .. قلنـا يالله هـاته.. عـاد حنـا في بالنـا ان القـطوع راح يوخر الزكمه .. المهم ويفتح الفمتـو .. واحطـه في اصبعي .. وأفركـه في خشمي ..

المهـم .. فجـأهـ وتجي الوالدهـ وتقـول وش فيـكـم .. حتـى المصخن اللي كان منسدح .. قام يقـول [مقّـآآآآآهـ ] << صـورهـ واحد يشم ويقـول آآهـ ويرفع عيـونه فـوق [يتلذذ]

قلت وانا في حـاله اغمـاء .. قطـوع ريح .. جت امي نظرت فيه وانه فمتـو .. قالت شربتوهـ ذا ولا وش سـويتـوا فيـه .. قال نـافل لا يمـه .. اخذنـا غطـاء القطـوع وصبينـا فيـه لين ملينـا الغطـاء .. ثم صبيت في خشمي .. وملينـاهـ مرهـ ثانيه .. وصبينـاهـ في خشم حمـد .. اما دهيليس .. رحنـا نقطرهـ تقطير في خشيمه ..

المهـم .. ودونـا المستشفـى لان اخذنـاهـ بكميـة كبيرهـ جداً .. رحنـا عند ذاكـ المصري .. اللي ابّتلش فينـا .. راح عند حمـد دخل في خشمـه مـويه .. وقال يالله يابنّـي نفّـر .. قال هـاااااا ((مصروع )) .. قال انّـفوور .. قال حمـد .. وين .. قال الدكتور .. هنـا في المغسلـة .. قال طيب .. ويقعـد يجمعـه بلغمـه الرجـال .. خخخخخققققق ((هنـا قد تجمع البلغم)) .. نظر المصري في حمـد لقـاهـ مستعد ((متجه المدفع الا وهـو البراطم نـحو الدكتور ))
قال لا يـابنّــي مش هنـاا مش هنــا [منفجع المصري مرهـ] .. راح حمـد نظر فينـا انا ونـآفل .. رجع للمصري .. وكمــل .. تفـــوووووووووووو ..

قال الله يخرب بيتـكـ الله يخرب بيتكـ .. اطلعـوا برى برى .. المهم .. ونطلع ويـودينـا الوالد الله يعافيـه .. لطبيب شعبي .. يقاله ابو طلق .. المهـم .. عـطانا عشـبه مدقوقه قـال استنشـقوهـاا .. قلنـا طيب .. وراح الرجـال .. ويـوم جـاء لقـانا نأكل العشبـه .. قال لا لا لا .. لا تأكلـونهــا .. يـوم دراء ولا الورعان انصـرعـوا ونـامـوا .. ومن بكرهـ .. جـاء قال الحل عندي انت ويـاهـ أقـولكـم استنشـقوهـا رحتـوا اكلتـوهـاا .. قـال ابكـويكـم من عند خشـومـكم .. نظر حمـد وهـو منفجع من اثر الخبر الى نـآفل .. نظر نـآفل فيني .. نظرت انا في ابو طلق .. قلت كيف تكـوينـا من عنـد خشـومنـا .. قال اوريـكم الحين .. المهـم .. ويدخل الملقاط ويحطه في خشـم حمـد .. عـاد حمـد يقـول ااااااع .. جـاء ابو طلق .. قال في منـوم لكـ .. قال وش ؟؟ .. قال انتظر .. ويفصخ شراباته .. ويحطه في خشم حمـد.. صار حمـد في غيبـوبه من قـوهـ الريحـه .. المهـم خلص من حمد .. قال ابـوي يمديـه مات الحين .. قال اصبر وتشـوفه يقـوم على طـول .. راح ابو طلق الوصخ .. وحط اباطه في خشم حمــد .. قام حمـد يركض .. جـاء دور نـآفل .. نظر في خشمـه واخذ الملقـاط والمهفـه .. والشرابات ودخلهـا كلها في خشمـه .. ما في فـايدهـ .. قال ابي اجرب الاباط .. برضـه يـوم حـط اباطه ابو طلق الوصخ .. راح نـآفل وقشع شعّرت ابو طلق [نتفهـا بسنونه] ..

المهم .. راح ابوطلق وكب المنقـد كله في خشم نـآفل .. وطاب .. اما انا .. جاني ويقـول خشمـكـ صغير.. يبيله عمليـه خطيرهـ .. حاول يكـوي خشمـي كل ما جـاء يكـوي خشمـي كـوى فمي .. اخر شيء .. راح وكـوى رجلي ..
طلعت وانا ما اعرف امشي زين .. كنـه ورع مضروب فلـكـه في المدرسه .. وصلت السيـارهـ .. لقيت الاثنين .. يبـون يحـطون قـطوع الريح مرهـ ثانيه [الفمتـو]
نقـز ابـوي وحذفهـم .. وطاح الفمــتو ..

فجـأهـ الا والهنـدي قاطع سلسلة ذكرياتي .. سديق انتا هينـا نص سـاعه .. يشتري ولا يطلع برى .. قلت طيب ..

شريت الاغـراض ورحت للبيـت ..

وصلت البيت لقيت اخـواني الاثنين قدامي .. دخلت ولقيتـهم يتضـاحكـون لمـا شـافوا الفمتـو .. المهـم .. ويجـي المطفـوق نـآفل أخذ الفمتـو .. وراح سـوى لنـا اربع أكـواب .. وقعـد نـآفل يقـول تتذكرون .. أول رمضـان صمـناهـ .. حمـد طلع من خشمـه كل الفمتـو ..اما انا شرقـت ولا قدرت اتنفس ..

عـاد هـو معجبـه يبي يغصنـا .. وكمـل السـالفه .. يقـول .. أول رمضـان صمنـاهـ .. دخلنـا المدرسـه حنـا الثـلاثـه .. نلبي .. لبيـكـ اللهم لبيـكـ جـو الطـلاب يضحكـون يقـولون شـوف ترى الجمـرات هـنـاكـ ..ومنـى في الملعـب .. نظر حمـد قـال اللهم اني صـائـم .. نظر فيـه نـآفل .. وقال لحمـد كذاب انا اولـه شفتـكـ يـوم تشرب المـويه بالدس .. جيـت انا ونقـزت في وجهه .. قلت ما اخس من قديد الا عسفـان .. نـآفل انت اولـه ما كل اللي بالثـلاجـه .. حتـى بقايا الاكل في خشـمكـ .. جـاء حمـد قـال يعني انت صـايم .. قلت أيـه .. لمـا ابتسـمت شـافـوا سبـانخ بين سنوني .. قال صـايم هـاهـ .. قلت بس اسد فيـه جـوعي

الا حمــد قـطع السـالفه قـال تتذكروون في رمضـان اللي قبل اللي راح .. ويصير وجهه نــآفل طماط

قـال حمــد .. تتذكرون ولد عمـي عبدالكريم ؟؟ .. يـوم جـاء يقـول وش رايكـم نرقم ياشبـاب .. والمشكـلة في العشر الاواخر من رمضـان .. كلنـا رفضنـا ماعـدا نـآفل بيـكـ .. قـام نـآفل يقـول ياخي إغراء .. قال حمـد .. ياشيـخ ريحيـن انت ويـاهـ ترقمـون بنـات خلق الله .. وتقـول إغراء والمشكـلة من زين لبسـكـم انت ويـاهـ .. واحد لابس ثـوب وشماغ من عهـد ابو جهل .. والثـاني لابس ترينقـه خضـراء ((ملابس رياضه حقت المنتخب السعـودي قديماً))


المهـم .. ارسل عبدالكريم نـآفل لبنت واقفه عند حق القهـوة .. قال رح رقمهـا بالبـلوتوث .. قال طيب .. راح نـآفل ويوقف قـدامهــاا .. ويأشر لهـاا شغلي البلـوتوث .. ويبحث في البلوتوث .. مالقـا الا [لا إله الا الله ] .. راح نـآفل نظر في عبدالكريم [والدموع ماليه عينه] .. وقال وهـو يبكي .. اععععععععععععع مافي احد بالبلوتوث ((صـورهـ واحد يتزحر في البكـاء )) .. قـال عبدالكريم .. طيب خذ الرقم واعطيهـا .. وتعال اركض وانا بستـناكـ في السيـارهـ .. اهم شيء تنحاش لان اكيد العسكري بيلحقكـ .. قال نـآفل خلاص طيب ..

المهم .. ويطرد وراء الحرمـه .. اخر شيء ركض وكل ماقرب منهـا يزيد السرعه .. يبي يرقمهـاا .. !!

ويتعداهـ وما عرف وش يسـوي .. راح صفق في القزاز حق المحل .. وتشـوف وجهه وسعابيله على القزاز .. والورقه طاحت .. قام ولقط وجهه .. وراح يركض لهـا مرهـ ثانيه ((مايعرف يستسلم )) ..

يـوم وصل عندهـا وهـو يلـوي يدينهــاا .. ويقـول خذي بسـرعه ..

الحرمـه انفجعت تحسبه مجنون ولا فيـه شيء .. يـوم شـاف المطاوعه .. يقـولهـا بسرعه خذيهـا .. شـوي الا والهيئة وراهـ .. ويركض وتركض وراهـ الحرمـه .. قال والله ياكروم انكـ خبير في الترقيـم .. والحرمـه تصارخ قال بعد وتصارخ شكلهـا جد عشقتني ذي .. يـوم نظر في يدهـ الا وشنطتهــا معه .. حذف الشنطه .. والهيئـة وراهـ .. ويركب على طـول في السيـارهـ .. وما سكر الباب .. عبد الكريم دعس بالسيـارهـ .. قـال عبد الكريم : بشر .. نظر جنبـه مافي احد .. ويقـول وينكـ فيـه يازفت .. شـوي الا رقبته تنسحب على وراء .. انخرش قال جاء اجلي .. يـوم دراء ولا انـه نـآفل منقطع نفسـه من كثر الركض .. قال وش جابكـ وراء .. قال وانا طاير .. كملتهـا لين لزقت في الكنبـه الخلفيه ..
قال رقمتهـاا قال ايه .. ويقعـدون يتظرون متى تتصل فيهـم طـول الليل .. يروح واحد الحمام [الله يكرمكـم] يتسلم الثاني الجـوال ولا يخـلون البطارية تفضي .. بس الوكاد ان ما احد اتصل فيهم

**

جـاء نـآفل نظر في حمـد .. وقال يعني انت مالكـ فضيحـه انت ودهيليس ..؟؟

جـاء حمـد قال وش فضيحتي ؟؟ ما عندي الا ان كان دهيليس

قال تتذكرون انت ودهيليس يـوم تروحـون وراء ثنين مسحبيـن فيكـم .. يـوم وديتوهـم مطعم .. وانتم طفـارا يعننكـم بتعشـونهـم .. راح كل واحد فيكـم شرى للي عنـدهـ ايسكريم .. واكتشفتـوا انهـم شباب يسحبـون فيـكم .. يـوم واحد منهم فكـ الغطـوى وقام يلحس الايسكريم .. وقمتـوا تتطاردون وراهـم .. ما قدرتـوا تمسكـونهـم الا لمـا تزحلقـوا وبانت الهيلاهـوب


شـوي الا ويأذن المغــرب .. رحنـا صلينـا .. الا ويجي واحد معروف عند الحـارهـ كلهـاا .. هذا فترة جيتـه على رمضـان .. اسمه [عميـّآن] .. طبعـاً الاسم أطلقـوهـ عليـه اغلبية النـاس لانه اعمـى بكل شيء .. مافي شيء فيـه الا واعمـى يجي يقـول في المسجـد يا ايهـا النـاس ان يدي قـد إصابهـا / العمـى

ولا يجـي يقـول /، يا ايهـا النـاس اني فقـير .. واشكـوا الى الله حاجتي / ولكـن اعميـت بسبب صدأ جبهه إبريق

طبعـاً هـو قبل رمضـان شغـال يربي الدلال .. وكذلكـ بعد رمضـان ..

اما في رمضـان شغلـته كل يـوم يصيبه عمـى في احد اركـانه ويأخذ فلـوس من النـاس (شحـاذهـ لتزداد)

نجـي عندهـ انا وحمـد ونـآفل .. نقـول لـه انت يا عميّـآن .. نظر فينـا .. ولمـا وخر الغترهـ عن وجهه
انفجعت وقلت له والله تغير شكلك أحس أنك إيطالي مولود في الغالة ..

نظر فينـا وش تبـون انتم .. تراكـم بالشينـاا .. قال حمـد : بالشينـكـ اجـل مسـوي عند الاشـارهـ شغـال وتقـول شقيق الشيـوخ وشيخ بعد ..


ضحكـ نـآفل وقال .. لا صدأ جبهه إبريقـ / وظهر المـوقد .. هههههههههههههههههههههههه

قال لا تفضـحـوني .. جيت انا وحذفت عليـه الدلال والأباريق وقلت لـه .. الوالد يقـول ربّ الدلال ..

قال طيب .. وراح يركض بالدلال يبي يسرقهـاا .. مسكـه ابو حسن وهـو رجل مسن(من اهل الحارهـ) .. وقال والله اني اعرفكـ ياعميّـآن .. عمـر الصلبي ما يتربى .. هـات دلالي اللي سرقتهـاا ..

رجعنـا البيت ..

الا واحد من خـويانـا يتصل ويقول تروحون معي ياشباب .. نتمشـى ..

ورحنـا تمشينـا ومرينا أقرب سـوق نتميلـح

المهـم ونلقـى مجمـوعه عبدات .. نظرنـا فيهـم وقلنا اللهم لا شماته ..

نظروا فينـا وقالوا .. الله وأكبر من زينـكم .. شـوفي بالله هذا الخبـل خشمـه ماينعرف هـو رايح ولا جـاي

جـاكـ حمــد قال والله راحمكم الله بهالميك أب والا تسان نلقى وجيهكم كلها لوحات إرشادية لمدينة حفر العتش

قالت الثانية لا شـوفي اللي افضع منه هذا خشمـه مايسدهـ بطانية <<نـآفل

نظروا فيني قـالوا ولا وجهه ذا ناقصه عضمتين ويطلع علم قراصنة .. << مسـوي انحف منـهم

قلت : والله من شاف براقعكم قال جالسين تبيعون شروخ في سوق الحمام ..

طلعنـا من السـوق ورحنـا نتمشـى .. وفي الاخير رجعنـا البيت


يـوم جينـا لقينـا امي مبسـوطـه مرهـ .. تقـول بكـرهـ رمضـان .. قـمت انا ونـآفل فتحنـا التلفزيـون .. ونشـوف وش المسـلسلات اللي بتجي في رمضـان .. المهـم سألتنـا امي تقـول : وش تسـوي انت ويـاهـ ؟؟

قال نـآفل ابي اتصل الحين على خـوياي .. ابي اشـوف وش المسـلسـلات اللي بتجي عشـان بتابعهـاا ..

قالت : لا وانا امـكـ .. رمضـان مهـوب للمسـلسـلات .. رمضـان صيـام وقيـام .. رمضـان عبـادهـ .. رمضـان شهر القران .. بعـدين المسـلسـلات حرام في غير رمضـان فكيف في رمضـان ..؟؟
رمضـان عشـان نزيد في الطاعات .. ونكثر من قـراءهـ القران .. ونكثر من الصدقات ..

قـلنـا انا ونـآفل أيـه والله صح .. صدقتي يايمـه ..

قـال حمــد .. بس يايمـه ليـه يكثرون المسلسـلات اذا جـاء رمضـان ؟؟

قالت : هذول لقـوا من يحمسـهم ولقـوا من يتفرج لهـم .. ومايبغـون شباب الاسـلام يكنـون صالحين .. ويتعبـدون الله .. يبغـون يزيدون من السيئات في رمضان .. طبعـاً كل هذا خطـة مدروسـه من الغرب .. !!

فجـأهـ .. الا ونسمع صـوت اللـعـاب نـاريـه .. وطلعـنـا انا ونـآفل وحمــد ،، لقينـا انواع الطراطيع .. واللي يطرطعـون شباب الحارهـ .. المهــم بعـد ما خلصت الطراطيع .. شفت ثنين مسكـوا ولـد صغيـر ويغصبـونه على انه يركب السيـارهـ .. رحت امشي على خفيف ليين وصلت عنـدهـم .. الا وجـات طلقـة ولا حسيت بنفسي [الى هنـا اتذكر] .. !!

جت السـاعه ثنعش الليـل وحمـد ونـآفل يدورونــي .. سألوا كل الشبـاب مالقـوني .. مشـوا بعيد شـوي ولقـوا دم في الارض ونعـالي الله يكرمكـم والكـاب تبعي .. زاد خـوفهم .. البغـوا الشـرطه .. ومـازال البحث جـاري .. ويعتقـد انـه ميت بنسبـه 30% ..

لا يـوجـد تقـدم .. هذا اخر كلمـة نطق بهـا الظــابط .. !!

((النهـاية))

مــلاحظـات :
*ان الفمتـو غير والقطـوع ريح غير
*اللي ما يعرف شغله لا يشتغلهـاا ..
*رسـاله الى الام .. الاغراض حقت المطبخ شيليـهـا عن بزرانكـ عشـان ما يسـوون مثل ماسـووى ابطال القصه

*يجــب على المسلـم ان يعلم ان رمضـان زيـادهـ في الطـاعات ليس زيـادهـ في مشـاهـدهـ المسلسلات

* ما الرابط بين رمضـان والفمـتوو ؟؟ <<جـآوبـو

*بعض اطبـاء الشعبيـه لا تروحون لهـم مرهـ .. في بعضهم يطلع مشعـوذ

*نلاحظ اكبر تجمع في الاسـواق في العشـر الاواخر من رمضـان .. لمـاذا ؟
*شعبـان بداية مـوسم الشحـادين .. كثييرين كـ أمثـال [عميـّـآن] ..

*لا احد يقعـد يسـوي فيهـا راعي فزعـه .. ويأكلهـا تراب .. اذا تبي تفزع لـحد روح ومعـكـ نـاس يسـاندونـكـ ..

*تدري انكـ نورت المـوضوع لمـا قريتـه